Louis Vuitton 包圍尖咀藝術館

Atnext: "08春夏已經同小馬哥高手過招合作過的 Richard Prince，再度以撚手懷舊通俗文化變時尚。今次以《 After Dark》命名，大包圍整幢尖咀藝術館，張力十足。

路易威登與馬積及，兩個名字居中恰正有一個隱形匹配的等號。為藝術展東征造勢，金童子這回再度抵港，白裇衫黑色蘇格蘭裙金勞軍 boots，以一身由舊年 8月正式「註冊」成為個人商標的輕鬆造型，踏台板接受東南亞近百傳媒群訪。

一切由著裙開始。

「說來有趣但話長。舊年 8月放完大假回到紐約，無時間購物，遂吩咐助手替我『辦貨』，大抵有鑑於我當時心情麻麻，開玩笑幫我買咗件 Comme des Garcons蘇格蘭裙， ever since then我愛上了著裙！代價是尋晚去中國會被拒門外……世界變了，某程度上人們越來越關注時裝，互聯網、雜誌、不同渠道不同平台接收更多資訊，令時裝吸納更多信眾。 In terms of making products，同 visual artists共同創作比較容易亦順理成章。事實個人對 Image Art向來有分無名的鍾愛，幫襯開倫敦三間 gallery，定期收到 catalogue，喺呢一刻未有新的獵物，對上成交是一幅 Richard Prince的作品。我不是那種相信博物館時裝的人，設計的出發點是表達自己，這一刻這一分鐘我所相信我認為是正確的，而不是去計算人哋想要乜做乜嘢賣得。本末倒置不是我懂得的創作方式。」

益發春風滿面的 Marc Jacobs，「剛在紐約買了一間新屋」，正和男友一起忙於設計未來安樂窩，壓力大快樂更大。

流行文化本來就建基於通俗之上，繽紛的喧鬧的入世的，相對嚴肅藝術那道生人勿近內有惡犬的隱形圍牆，流行文化更像鄰家女孩，未必是大美人料子，但勝在賞心悅目可親不帶刺。這次乘 French May期間上馬的《路易威登：創意情感》藝術展，內容主要分為三個部分：明人不作暗語以「路易威登與藝術」打頭陣，請來一系列品牌古董行李箱和歷年 crossover精品助陣，焦點自然落在 Stephen Sprouse、村上隆和 Richard Prince三位與 LV對親家的作品。第二部分以路易威登創意基金會之名出發，展出由 Frank Gehry設計不日落成的基金會建築模型同時精選部分名下珍藏；第三部分守尾門主題是「香港七賢」，找來七位本地藝壇新進，在 Monogram 100%完全缺席的情況下各就各位自由發揮。"

灣仔Wooloomooloo 頂樓露天酒廊

Atnext: "踏入 Wooloomooloo頂樓露天酒廊，即時感到時空交錯，以為自己去了曼谷地標 Sirocco。酒廊位於灣仔軒尼詩道 256號的 32樓，居高臨下，望到維港和跑馬地馬場景，腳下車水馬龍，被大都會氣息包圍。靠窗的藤椅咕，還有大梳化，坐下去就不願起身，完全沉溺在度假感當中。

新開的 Wooloomooloo灣仔店，走高級 fine dining路線。 31樓餐廳部分，有 270度落地玻璃窗無敵景。深淺木色調裝修，有豪宅氣派。而除了有法國、澳紐和智利的葡萄酒外，還是全港首間以英國王室御用的 Champagne Bollinger作為 house champagne的餐廳。菜式標榜天然健康，灣仔店更獨家選用 100%天然的美國牛扒和威爾斯羊架。

菜式款式雖然大路，但勝在用料靚。而且 32樓酒廊景色夠震撼，分分鐘成為香港旅遊地標，遊客必到景點。不過，酒廊暫時只供包場，或招待餐廳客人。待營運多一段日子，才可以齋飲齋蒲，真期待﹗"

Maybach 62 Zeppelin 全球限量 100部 極品豪車

Atnext: "上網搜尋 Maybach嘅舊資料，發現多不勝數嘅報道係提及邊位大富豪坐住 Maybach絕塵而去。近有劉鑾雄、李國寶，遠嘅則數車路士富豪班主阿巴莫域治。名氣加矜貴，自然得富豪垂青。今次呢架 Maybach Zeppelin，闊別超過半個世紀再次登場，全球限量 100部、世界首款車內香水系統等，集所有頂級精品於一身，顯示其罕中之罕嘅身份。

集「最好」於一身打造嘅 Zeppelin，原來早於 1932年已第一次出現，當年被譽為汽車工程技術終極作。 Maybach呢個超級豪華品牌一向恃着貴精不貴多、內外兼備嘅形象保持着過千萬嘅身價，今次再次推出 Zeppelin當然唔可以失禮呢個更加尊貴嘅名字。全球限量 100部，以先訂先得形式推出，除車身前後都有 Zeppelin呢個限量標記外，引擎位置更首次鑲有刻上「 ONE OF 100」銘牌凸顯身份。當然，淨係得個牌又點足以標示呢部限量版嘅不凡。全球首創嘅車內香水噴霧裝置，係呢架 Zeppelin另一重要賣點，喺後座中控槽上加上一個半圓形嘅閃亮玻璃球，香氣就會喺 10至 12秒內從玻璃球頂部四個縫隙霧化噴出，系統更體貼地喺操作 10分鐘後自動關閉。車主更可以選擇由世界知名香薰專家 Givaudan為 Zeppelin調製嘅獨有香味，有綠茶及檀木香味兩款。

利用上一代嘅 57 S同 62 S做藍本，操控同馬力有一定信心保證， AMG嘅 V12引擎，以 62 Zeppelin嘅巨型車身嚟計， 0-100km/hr加速僅需 5.1秒，爆炸力驚人。單看引擎數據、車身外形，你以為 62 Zeppelin同 62 S分別不大？咁就錯喇。因為 Zeppelin身上嘅心思同功夫，全部喺細微位。如可以減低風噪嘅流線型後視鏡、有漸變拋光效果嘅 20吋輪胎、強化車身立體感粗腰線間花、內櫳物料提升及顏色配襯設計等，呢一點點嘅改變，足以令 Zeppelin嘅矜貴度增強 10倍，正合一眾富豪要求，難怪記者會當日，代理充滿信心地表示：「金融海嘯對我哋影響不大，香港已經有一個客咗落訂。」

引擎： 5,980cc V12雙渦輪增壓引擎
馬力： 471kw/4,800-5,100rpm
扭力： 1,000Nm/2,000-4,000rpm
傳動： 5前速自動波
售價：$9,800,000起（較短身的 57 Zeppelin售價為$8,500,000起）
查詢： Maybach Centre（ 2594 8133）"