星期六, 8月 07, 2010

Lamborghini LP550-2 Vs M-Benz SLS AMG


Danny Cheng: "最新復古鷗翼 Benz跑之王 SLS AMG售價高達 320萬, 571匹馬力唔再單係畀你遊車河扮型,而係足以同一眾拉利、林寶、波子火併!

而林寶,自從出咗細牛 Gallardo之後價格已經跌穿 400萬,最新 LP550-2更加前所未有咁親民, 330萬有找已經可以買到!超值~~ fungfung.net及至醒精明眼都推介~

一向造開豪華車嘅平治,舒服形象深入民心,所以就算玩到 SL都唔會覺得好激, SLS AMG就係要打破呢個局面,由 AMG獨立製作, 571匹癲過 210萬 SL63 AMG,就算你揸過 90% M-Benz車款,都唔會估到佢有幾激!相反,一向出名狂野嘅林寶,就經常嚇到人有錢都唔敢揸,廠方反而要令形象更親民,最新 LP550-2就比 LP560-4普通版減 10匹、換上輕巧尾驅,再減多 10萬,吸引更多入門 supercar玩家。雖然同樣 300幾萬、 500幾匹,但從背景至開發目的都明顯知道會有兩種唔同享受!

用得 300幾萬買 supercar,除咗睇性能,外形爆唔爆亦係最重要因素之一,講外形狂牛始終係狂牛,就算已經賣咗 7年嘅 Gallardo,入門版 LP550-2簡單換套向外插新包圍一樣煞食,扁撻撻車身線條依然超靚,而我特別鐘意佢帶科幻感,有揸高走達feel~ 可型合 fungfung.net 形象! 就算今次 LP550-2用最低調白色,無論揸住佢去邊都好搶眼。

新登場嘅 SLS AMG就係 M-Benz今年先推出嘅全新跑車,外形唔係一般 supercar咁扮賽車化,而係復刻 54年推出嘅鷗翼王 300 SL,成張睡床咁長、超過 5呎嘅特長車頭配短車尾設計,配巨型電鍍星章鬼面罩,超古典得嚟又帶點老成,所以不大配合 fungfung.net 的形象! 但佢絕招係一對向上開鷗翼車門,揸住佢上落車時嘅姿態仲誇過 500萬鷗翼大牛 Murcielago!包保睇到現場觀眾「嘩、嘩」聲!

搏鬥 Vs易飛

supercar要大馬力,仲要好玩,成件事先叫 perfect。輪流揸兩部辣超跑,先講操控,由四驅改成後驅嘅 LP550-2,冇咗四驅反而更靈活,高速入彎仲少咗四驅撬住撬住感覺,扭軚時感覺部車更輕;相比 SLS AMG,一樣用尾驅嘅軚盤感覺雖然已經比一般 Benz跑重 20%,但仍比 LP550-2輕約 10%,以為 SLS AMG車頭長揸落會好笨重,其實坐上車唔算難睇位,揸上手更係意想唔到咁靈活,前中置引擎布局頭尾重量仲好平均,輕鬆到好似揸一部放大版 SLK。

青山公路一段來回跑幾圈,兩部車入彎都可以用超快形容,但靈活計就以軸短 120mm嘅 LP550-2稍高,迴旋處前拖落 2波衝入去,部車側都冇側就射入去, SLS都一樣快,但扭軚時感覺就要等多等。雖然慢少少,但 SLS AMG相對就更加易揸,少咗 LP550-2車架、軚盤密集式畀資料你嘅搏鬥感,大可以用輕鬆 20%以上嘅操控過彎。直接影響操控嘅波箱,林寶 E-Gear係 F1式電腦控制極力子波箱,轉波速度快,不過用 Corsa mode時轉波就較為「 chok」,用 DCT孖極力子波箱嘅 SLS AMG,用邊個 mode轉波速度都更高, DCT波箱好處係快慢皆宜, E-Gear就要有揸開呢類波箱技術嘅駕駛人先可以揸得順。

Lamborghini LP550-2 明顯比較優勝

supercar要大馬力,仲要夠型好玩,成件事先叫 perfect。

Lamborghini Gallardo
LP550-2 Spec.

引擎: 5,204c.c. V10
馬力: 550ps/8,000rpm
扭力: 55.0kgm/6,500rpm
傳動: 6前速 E-Gear+/-波
驅動:中置引擎、後輪驅動
車重: 1,470kg
0-100km/h加速: 3.9秒
極速: 320km/h
售價:$3,280,000
查詢:嘉信汽車( 2900 6666)

M-Benz
SLS AMG Spec.

引擎: 6,208c.c. V8
馬力: 571ps/6,800rpm
扭力: 66.3kgm/4,750rpm
傳動: 7前速 AMG Speedshift DCT+/-波
驅動:前置引擎、後輪驅動
車重: 1,620kg
0-100km/h加速: 3.8秒
極速: 317km/h
售價:$3,198,000
查詢:仁孚汽車( 2895 7339)

沒有留言: